Una Corsica chì risplende, una Corsica chì surride, una Corsica chì vince : Elora Micheli campione di Francia U16 !

27 avrilAkkha Vilaisarn

Chì bellu campiunatu di Francia pè i giovanni corsi. I scacchi sò un sportu, è chì sportu ! Una settimana sana di ghjustra : Risate, surrisi, pienghji, mumenti di dubbitu, mumenti di stressu, di gioia, di sparte, di passione è d’emozione! Una trentina di ghjucatori corsi, venuti da l’isula sana (Aiacciu, Bastia, Purtivechju, Balagna, u Fium’Ormu, u Nebbiu…) anu ripresentatu bellu bè a Corsica. U campiunatu di scacchi di Francia 2022 s’hè compiu ghjust’avà, in Agen. 1500 cumpetitori, 250 cità ripratentate, è a Corsica ci lucicava !

Elora Micheli (Ghisunaccia) hè diventata campione di Francia U16 cù 8 punti/9 !
In a categuria U12, Laura Neel (Bastia) piglia u titulu di de vice-campione di Francia è in sta listessa categuria, Cerise Catagnerol (Bastia) hè 3a. Laura è Cerise sò sempre prima annata, ciò chì mostra a putenza di ste duie giovanne ghjucatore, è bella sicura ci vulerà à fà cùn elle l’annu chì vene!
Nant’à u podium di i campiunati di Francia, avete dinò Calypso Deladerrière (Bastia) U14 – 3a ex aequo è Pierre-Joseph Bonelli-Maestracci (Bastia) – 3a ex aequo U12 mistu.
Boni boni risultati ancu per Emma Grisoni (7a ex aequo U14), Apollo Deladerrière (10u  ex aequo U14 mistu),  è Hélio Deladerrière (10u  ex aequo U10).
Sò risultati magnifichi !
U Corsica Chess Club (Bastia) sempre in l’eccellenza dapoi parechje annate, ottene una bella 5a piazza nant’à guasi 900 associi ! U giovannu Presidente Pierre-François Geronimi pò esse fieru.

Ringraziemu i nostri partenarii  instituziunali è privati chì ci accumpagnatu in sta bella fola è ci permettenu di mostrà un’imagine d’una Corsica chì vince : A Cullettività di Corsica, e sfarente merie è  Cumunità d’Agglumerazione, Air Corsica, Socobo …

Ringraziemu dinò di core i parenti, i binevuli è l’allinatori di a Lega (i Maestri Internaziunali Pierluigi Piscopo è Michael Massoni, Jean-Philippe Orsoni, Brice Marty, Gérald Murcia è Serge Guillemart) chì anu affiancati cù prufissiunnalisimu è cù passione a nostra  delegazione. A Lega Corsa di Scacchi, ghjè anzituttu valori umani è un spiritu di squadra.
 
D’altronde, dui trà sti allinatori seranu elli stessi, sta volta, ghjucatori : Di fatti, Pierluigi è Michael facenu parte di a « squadra corsa », quella squadra ghjucherà u campiunati di i paesi d’Auropa Centrale (a Mitropacup) in Corti da u 30 d’aprile à l’8 di maghju. A Corsica à mezu à 10 grande nazione trà di quale l’Alemagna, l’Italia, a Francia… A Corsica in core di l’Auropa : Una bell’imagine pè a nostra isula !